Íslenska karlalandsliðið tapaði á grátlegan hátt gegn Portúgal í kvöld í undankeppni EM.

Leikið var á Laugardalsvelli en Ísland var að tapa sínum öðrum leik á stuttum tíma eftir tap gegn Slóvakíu um helgina.

Eitt mark var skorað í leik kvöldsins en það gerði enginn annar en Cristiano Ronaldo fyrir Portúgal.

Markið var skorað í uppbótartíma og var um afskaplega grátlegt tap að ræða. Ísland kláraði leikinn einnig manni færri eftir rauða spjald Willums Þórs Willumssonar er níu mínútur voru eftir.

Sverrir Ingi Ingason átti góðan leik í vörn Íslands og ræddi við blaðamenn eftir leik.

,,Þetta var mjög svekkjandi, sérstaklega þar sem við héldum svona lengi og stóðum inni í leiknum sem var planið og reyna að setja eitt á þá. Við þurfum að taka það jákvæða úr þessu sem var frammistaðan og effortið sem við lögðum í þetta,“ sagði Sverrir.

,,Planið var að reyna að taka eitthvað út úr þessum leik en það gekk ekki í dag og við þurfum að byggja á þessu. Þetta var erfitt manni færri, þeir voru komnir með menn inná sem voru ferskir og svona, það lá aðeins á okkur. Við þurfum að líta á hvað fór úrskeiðis í markinu og laga það.“

,,Ég er búinn að sjá einhverja mynd af þessari línu, þetta var voðalega tæpt sko. Við hefðum líka geta fengið víti gegn Slóvakíu síðast og það virðist ekkert vera að detta með okkur eins og staðan er núna.“