Íslenska karlalandsliðið tapaði á grátlegan hátt gegn Portúgal í kvöld í undankeppni EM.

Leikið var á Laugardalsvelli en Ísland var að tapa sínum öðrum leik á stuttum tíma eftir tap gegn Slóvakíu um helgina.

Eitt mark var skorað í leik kvöldsins en það gerði enginn annar en Cristiano Ronaldo fyrir Portúgal.

Markið var skorað í uppbótartíma og var um afskaplega grátlegt tap að ræða. Ísland kláraði leikinn einnig manni færri eftir rauða spjald Willums Þórs Willumssonar er níu mínútur voru eftir.

Jóhann Berg Guðmundsson, fyrirliði Íslands, ræddi við blaðamenn eftir leikinn í kvöld.

,,Mér fannst við spila mjög vel í dag, sérstaklega í fyrri hálfleik. Við þorðum að spila honum og það vantaði seinna að þora aðeins meira með boltann. Við vörðumst gríðarlega vel og það var frábær stemning á vellinum sem hjálpar gríðarlega mikið og svo er það að fá þetta mark á sig sem er ansi þreytt og erfitt að kyngja,“ sagði Jóhann.

,,Ég get lítið um markið sagt, þetta var erfitt manni færri og þreyttar lappir en mér fannst við vera mjög solid og margt jákvætt. Við getum tekið fullt af jákvæðu úr þessum glugga.“

,,Það eru smáatriði sem við þurfum að laga. Við þurfum að vera fókuseraðir í allar mínútur og það má ekki slökkva á sér í eina sekúndu. Þetta eru þrjú mörk sem við eigum að koma í veg fyrir.“