Íslenska karlalandsliðið tapaði á grátlegan hátt gegn Portúgal í kvöld í undankeppni EM.

Leikið var á Laugardalsvelli en Ísland var að tapa sínum öðrum leik á stuttum tíma eftir tap gegn Slóvakíu um helgina.

Eitt mark var skorað í leik kvöldsins en það gerði enginn annar en Cristiano Ronaldo fyrir Portúgal.

Markið var skorað í uppbótartíma og var um afskaplega grátlegt tap að ræða. Ísland kláraði leikinn einnig manni færri eftir rauða spjald Willums Þórs Willumssonar er níu mínútur voru eftir.

Alfons Sampsted, hægri bakvörður Íslands, ræddi við blaðamenn eftir leik.

,,Eins og þú segir, svekkjandi. Það má segja það sem maður vill um þetta mark, ég er búinn að sjá þetta einu sinni aftur og það er matsatriði hvort þetta sé rangstaða eða ekki. Sá sem fær boltann er ekki rangstæður en það eru menn þarna fyrir innan sem hafa áhrif á leikinn,“ sagði Alfons.

,,Ég hugsa að mjög margir í stúkunni séu sammála um það að liðið er á leið í frekar góða átt akkúrat núna þannig við getum byggt ofan á þetta fyrir næsta glugga.“

,,Þetta var frekar vel leikgreint hjá þjálfurunum. Þeir voru spenntir að við myndum stíga út úr pressunni án þess að þeir þyrftu að hreyfa boltann en við gerðum lítið af því og opnuðum lítið af glufum fyrir aftan okkur.“