Spænskir miðlar segja að Daniel Alves fyrrum varnarmaður Barcelona gæti átt yfir höfði sér allt að tólf ár á bak við lás og slá.

Réttarhöld fara fram í október en Alves er sakaður um að hafa nauðgað konu.

Alves var handtekinn í Barcelona í byrjun árs, grunaður um kynferðisbrot á skemmtistað þann 30. desember. Bakvörðurinn hefur neitað sök síðan og sagt að hann hafi stundað kynlíf með meintum þolanda með samþykki þeirra beggja.

Ákveðið var að fangelsa Alves án möguleika á tryggingu en lögfræðingar hans áfrýjuðu. Beiðni þeirra hefur nú verið hafnað og mun Alves því sitja inni á meðan rannsókn stendur.

Alves var tilbúinn, gegn því að hann yrði laus gegn tryggingu, að gefa fram vegabréfið sitt og vera með öklaband. Hann var til í að mæta og gera grein fyrir sér daglega og ekki fara í minna en 500 metra fjarlægð frá heimili eða vinnustað meints þolanda.

Þetta dugði ekki til og var beiðninni hafnað.

Í niðurstöðu dómstóls segir að ekki sé hægt að sleppa Alves gegn tryggingu af ótta við að hann reyni að komast til heimalandsins, Brasilíu. Hann sé fjársterkur maður og gæti því tekist það með einum eða öðrum hætti.

Brasilía framselur ekki eigin íbúa þó svo að þeir hafi fengið dóm í öðru landi. Þannig gengur fyrrum knattspyrnumaðurinn Robinho til að mynda laus þar í landi þrátt fyrir að hafa fengið níu ára dóm fyrir hópnauðgun á Ítalíu.

Alves er 39 ára gamall og á glæstan feril að baki. Hann hefur unnið alla stærstu titlanna í félagsliðaboltanum og leikið með liðum á borð við Barcelona, Juventus og Paris Saint-Germain.

Alves varð elsti leikmaður til að spila fyrir hönd Brasilíu á HM í Katar fyrir áramót.