Íslenska karlalandsliðið tapaði 2-1 gegn Slóvakíu í kvöld í þriðja leik sínum í riðlakeppni undankeppnis EM.

Tapið var mjög svekkjandi en næsta verkefni verður enn erfiðara gegn engum öðrum en Portúgal.

Ísland er aðeins með þrjú stig eftir þrjá leiki en tapið í kvöld var mjög svekkjandi og mögulega ósanngjarnt.

Willum Þór Willumsson fékk að byrja leikinn fyrir Ísland í kvöld og stóð sig vel. Willum fiskaði til að mynda vítaspyrnuna sem Ísland skoraði úr.

,,Menn voru ótrúlega svekktir. Við byrjuðum þetta virkilega vel og fengum fullt af sénsum sem við áttum að nýta betur. Mér fannst við vera mjög góðir í fyrri hálfleik og hefðum kannski átt að vera komnir yfir þá. Svo erum við með 1-1 stöðu og svo kemur annað skítamark,“ sagði Willum.

,,Eins og íslenska liðið var þá hefðum við kannski nýtt tvö af þessum þremur eða fjórum færum sem við fengum og ef við komumst í 1-0 eða 2-0 þá er þetta allt annar leikur.“

,,Vítið var réttur dómur, hann klippir mig niður. Við lögðum mikla orku í fyrri hálfleik og það er venjulegt þegar þú ert búinn að leggja mikla orku og við vorum mjög direct þá verða menn smá þreyttir.“