Íslenska karlalandsliðið tapaði 2-1 gegn Slóvakíu í kvöld í þriðja leik sínum í riðlakeppni undankeppnis EM.

Tapið var mjög svekkjandi en næsta verkefni verður enn erfiðara gegn engum öðrum en Portúgal.

Ísland er aðeins með þrjú stig eftir þrjá leiki en tapið í kvöld var mjög svekkjandi og mögulega ósanngjarnt.

Alfreð Finnbogason, framherji Íslands, ræddi við blaðamenn eftir tapið en hann gerði eina mark Íslands í tapinu.

,,Við getum gert út um leikinn í fyrri hálfleik, við fáum 3-5 sénsa til að búa til færi en það vantar lokasendinguna. Það er svekkjandi í svona leik,“ sagði Alfreð.

,,Þetta var gríðarlega opið í fyrri hálfleik, þeir gáfu okkur boltann á hættulegum svæðum og í svona leikjum sem eru svona jafnir sem ráðast yfirleitt á einu marki þá verðum við að gera betur í svona stöðum.“

,,Við vildum byrja af krafti og við gerðum það en það tekur á að pressa þá svona hátt. Við byrjuðum allt í lagi í seinni hálfleik við fundum ágætis stöður en fórum svo aftar og aftar á völlinn. Því miður kemur svo þetta skrípamark en maður þarf að vera í teig andstæðingsins til að skora mörkin.“

Alfreð ræddi svo þá tilfinningu að skora á Laugardalsvelli eftir talsvert langan tíma.

,,Tilfinningin var mjög skemmtileg og sérstök, ég viðurkenni það. Maður hefur beðið eftir þessu mómenti lengi og það var mikil gleði sem braust út en það var leiðinlegt að geta ekki fylgt því eftir að geta ekki fengið þrjú stig í þokkabót.“