Það er áhugi víða á Kylian Mbappe, en framtíð kappans er í lausu lofti eftir bréf sem hann sendi félagi sínu, Paris Saint-Germain, í gær.

Mbappe skrifaði undir tveggja ára samning við PSG í fyrra með möguleika á árs framlengingu. Aðeins hann gat virkjað þann möguleika. Kappinn hefur ákveðið að gera það ekki, en greint var frá þessu í gærkvöldi.

PSG er mjög hissa á formlegu bréfi sem Mbappe sendi félaginu í gærkvöldi þess efnis að hann hyggðist ekki virkja möguleikann á eins árs framlengingu. Sá möguleiki hefði nefnilega sjálfkrafa verið sleginn af borðinu 1. ágúst næstkomandi, nema samið væri um annað.

Franska félagið íhugar því nú alvarlega að selja Mbappe. Það ætlar í hið minnsta ekki að missa hann frítt svo það er annað hvort að selja hann í sumar eða sannfæra hann um að skrifa undir nýjan samning.

The Times heldur því fram að Chelsea ætli að blanda sér í kapphlaupið um Mbappe eftir að fréttir gærdagsins bárust. Liðið var í miklum vandræðum á nýafstaðinni leiktíð og yrði Mbappe heldur betur styrking. Þá er Mbappe einnig orðaður við Manchester United.

Mbappe var sterklega orðaður við Real Madrid í fyrra áður en hann framlengdi við PSG. Félagið er talið sigurstranglegast til að landa honum en ensku félögin vilja nýta sér stirt samband PSG og Real Madrid til að landa honum.

Ósætti var með Real Madrid innan herbúða PSG eftir að spænska félagið bauð í Mbappe 2021.