Framtíð Arnórs Sigurðssonar er enn óljós eftir að lánsdvöl hans hjá Norrköping lauk á dögunum. Kappinn einbeitir sér nú að komandi leikjum með íslenska landsliðinu.

Ísland mætir Slóvakíu á laugardag og Portúgal þremur dögum síðar í undankeppni EM 2024. Liðið tapaði fyrsta leik riðilsins gegn Bosníu, áður en Strákarnir okkar gjörsigruðu Liechtenstein. Liðið þarf helst að vinna Slóvaka, í það minnsta alls ekki tapa.

„Stemningin er mjög góð. Það er alltaf gaman að koma saman með strákunum í landsliðinu og maður finnur að það er góð stemning. Það eru mikilvægir leikir framundan,“ segir Arnór við 433.is.

Liðið gerir sér fulla grein fyrir mikilvægi leiksins gegn Slóvökum.

„Við vitum hversu mikilvægur leikur það er. Það er mjög mikilvægt að við höldum í okkar og förum ekki að ofhugsa hlutina þá þessi leikur skipti gríðarlega miklu máli. Við þurfum að vera 110% klárir og sækja þrjú stig.“

Arnór er á mála hjá CSKA Moskvu. Lánssamningur hans við Norrköping rann út nýlega. Kappinn var spurður út í framtíðina með félagsliði.

„Það fer vonandi að skýrast fljótlega. Ég vona að það fari að klárast svo ég geti einbeitt mér að því.“

Viðtalið í heild er hér að neðan.