Antonio Cassano elskar fátt meira en að hrauna yfir Jose Mourinho, núverandi stjóra Roma á Ítalíu.

Mourinho komst í blöðin eftir úrslitaleik Evrópudeildarinnar þar sem hann baunaði á Anthony Taylor, dómara leiksins, eftir tap í vítaspyrnukeppni gegn Sevilla.

Cassano vonar að Mourinho láti ekki sjá sig í Róm eftir sumarfríið en hann er sjálfur fyrrum leikmaður félagsins og goðsögn í augum margra.

Cassano hraunaði yfir Mourinho fyrr á tímabilinu og sagði hann hugsa meira um eigin ímynd en fótboltann.

,,Dómarinn gerði sín mistök en það sama má segja um leikmenn sem missa af marktækifærum,“ sagði Cassano.

,,Ég tel að Taylor hafi verið í vandræðum með þetta verkefni. Allt sem gerðist eftir það byrjaði á Mourinho, hann mætti á bílastæðið til að mótmæla og ræða við dómarann.“

,,Við höfum allir séð myndböndin og það varð til þess að stuðningsmenn Roma áreittu Taylor og hans fjölskyldu í kjölfarið.“

,,Hann sagðist vera á leið í frí og vonandi þá snýr hann ekki aftur til Ítalíu, hann er skíthæll. Hann hefur ekki gert annað en að skemma orðspor Roma og ímynd félagsins.“

,,Ég vona fyrir mitt fólk að Mourinho snúi aftur til Portúgals og láti aldrei sjá sig á æfingasvæði á Ítalíu aftur.“