Nikolaj Hansen, framherji Víkings, var mikið til umræðu í vor, ásamt Kjartani Henry Finnbogasyni, framherja FH.

Sá síðarnefndi var dæmdur í leikbann af Aga- og úrskurðarnefnd KSÍ fyrir olnbogaskot í Hansen í leik liðanna.

Nokkrum dögum síðar vildu einhverjir sjá Hansen fá sömu refsingu fyrir olnbogaskot í leik gegn HK.

Grétar Sigfinnur Sigurðarson, fyrrum knattspyrnumaður, var gestur hlaðvarpsins Chat After Dark á dögunum. Þar kom Hansen til umræðu.

„Ég þoli ekki hvað er ekki talað um olnbogaskotin hans. Ég hef spilað á móti honum. Ég hugsaði: Kann hann ekki að fara upp í skallabolta án þess að fara með hendurnar upp?

Nú gerði hann þetta um daginn og það fór svolítið fyrir því. En ég held að menn fatti ekki hvað hann gerir mikið af þessu,“ sagði Grétar í þættinum.

Hann hélt svo áfram.

„Þetta er bara bannað. Og þegar þú ert svona stór og sterkur er bara líklegra að þú farir í einhvern.“