Fram tapaði 4-2 gegn KA í Bestu deild karla á mánudag. Sparkspekingurinn Kristján Óli Sigurðsson segir að ósætti sé innan félagsins með þjálfarann Jón Sveinsson, þar sem hann hafi ekki verið með liðinu síðustu dagana fyrir leikinn.

„Nonni Sveins fór norður á miðvikudaginn, hitti þá síðan bara á Hótel Kea einum og hálfum tíma fyrir leik. Hann var ekki á æfingu miðvikudag, fimmtudag, föstudag og laugardag. Er það eðlilegt?“ segir Kristján í nýjasta þætti Þungavigtarinnar.

Kristján heldur áfram og segir ósætti í Úlfarsárdal með þetta.

„Hann er með frjálsa mætingu. Leikmenn eru orðnir sturlaðir af reiði yfir þessu.

Þetta er mikill kóngur, sat pollslakur á Hótel Kea þegar menn voru að lenda.“

Fram er í tíunda sæti Bestu deildarinnar og hefur tapað þremur leikjum í röð. Í kvöld tekur liðið á móti Keflavík.