Mason Mount, leikmaður Chelsea, hallast að því að semja við Manchester United í sumar. Búist er við því að félögin hefji viðræður á næstunni.

The Athletic sagði frá þessu fyrir skömmu.

Samningur hins 24 ára gamla Mount við Chelsea rennur út eftir ár og er ekki útlit fyrir að hann kroti undir nýjan. Lundúnafélagið vill því selja kappann í sumar til að fá fjármuni fyrir hann.

Daily Mail sagði frá því í morgun að United væri til í að bjóða 55 milljónir punda. Chelsea vill líklega mun meira.

Mauricio Pochettino, sem er að taka við Chelsea í sumar að öllum líkindum, vill hafa Mount áfram á Stamford Bridge. Til þess þyrfti miðjumaðurinn þó líklega að skrifa undir nýjan samning.

Mount hefur einnig verið orðaður við Arsenal og Liverpool, auk fleiri liða. Samkvæmt nýjustu fregnum átta þau sig þó á því að leikmaðurinn vilji helst fara á Old Trafford.

Englendingurinn er uppalinn hjá Chelsea og hefur spilað 195 leiki fyrir aðalliðið á ferli sínum. Í þeim hefur hann skorað 33 mörk.