Javier Zanetti, goðsögn Inter, vill frekar að hans menn mæti Manchester City en Real Madrid í úrslitaleik Meistaradeildar Evrópu.

Inter sló granna sína í AC Milan úr leik í gær og er komið í úrslitaleikinn.

Þar verður andstæðingurinn Real Madrid eða Manchester City. Þau mætast í seinni leik sínum í undanúrslitum í kvöld, en fyrri leiknum lauk með 1-1 jafntefli í spænsku höfuðborginni.

„Þetta er mjög tilfinningaþrungið og liðið á þetta skilið,“ sagði Zanetti, sem vann Meistaradeildina með Inter árið 2010, eftir leik í gær. Hann fjallaði um hann fyrir Sky á Ítalíu.

„Við sjáum hver andstæðingurinn verður en það er þegar mjög stórt að vera komnir alla leið hingað.

Ég væri til í að sleppa við að mæta Real Madrid því það er eins og keppnin sé búin til fyrir þá.“