Åge Hareide, þjálfari íslenska karlalandsliðsins í knattspyrnu, hefur rætt við Gylfa Þór Sigurðsson um mögulega endurkomu kappans í íslenska landsliðið.
Norðmaðurinn sagði frá þessu í Dagmálum á mbl.is.
Hareide, sem tók við íslenska karlalandsliðinu af Arnari Þór Viðarssyni í síðasta mánuði, hefur mikinn áhuga á að fá Gylfa aftur í landsliðið og ræddi við hann á fimmtudaginn síðasta.
„Ég tjáði honum það að persónulega þá væri ég mjög áhugasamur um það að fá hann aftur í landsliðið,“ sagði Hareide í Dagmálum.
„Ég myndi elska að fá hann aftur og það væri bæði gott fyrir hann held ég og líka fyrir leikmannahópinn,“
Gylfi hefur ekki spilað knattspyrnu síðan vorið 2021 með Everton.
Hann varð laus allra mála fyrir um mánuði síðan og er kominn heim til Íslands eftir að hafa verið í farbanni í Bretlandi í næstum tvö ár.
Það er ekki víst hvort Gylfi ætli að taka knattspyrnuskóna fram á ný.
