Íþróttavikan er komin á fulla ferð á 433.is og í Sjónvarpi Símans. Helgi Fannar Sigurðsson og Hrafnkell Freyr Ágústsson sjá um þáttinn og fá þeir til sín góða gesti alla föstudaga. Í þetta skiptið voru þeir Andri Geir Gunnarsson og Vilhjálmur Freyr Hallsson úr hlaðvarpinu Steve Dagskrá gestir.

KR hefur farið skelfilega af stað í Bestu deild karla eins og mikið hefur verið talað um. Vesturbæjarstórveldið var auðvitað tekið fyrir í þættinum.

„Það þarf eitthvað að gera þarna. En ég er ekki á því að það eigi að reka Rúnar (Kristinsson),“ sagði Hrafnkell, en nefndi að hann vildi sjá þjálfara Gróttu taka við ef KR ætlar í þjálfarabreytingar á annað borð.

„Ef það á að skipta Rúnari út myndi ég vilja sjá þá fara í Chris Brazell.“

Andri bendir á hversu mikils metinn Rúnar er í Vesturbænum.

„Það myndi ekki gerast að Rúnar missi klefann. Það er það mikil virðing borin fyrir honum.“

Markvörðurinn Simen Lillevik Kjellvold var á meðal þeirra sem komu til KR fyrir tímabil. Hann hefur alls ekki heillað. Hrafnkell segir hann ekki betri en Aron Snæ Friðriksson, markvörðinn sem fyrir var hjá KR.

„Aron er fyrir mér meðal Bestu deildar markmaður. Ef þú ætlar að sækja einhvern annan þarftu að sækja topp markmann.“

Það er þó erfiðara þar sem Simen var fenginn að utan. „Hann er með íbúð á leigu og það er búið að leggja vel í þetta.“

KR mætir Breiðabliki í dag og velti Helgi því upp hvort það væri ekki góður leikur til að snúa dæminu við.

„Breiðablik um helgina á lélegum Meistaravöllum. Það er kannski bara staðurinn til að snúa þessu við?“

„Mögulega er þetta leikurinn. Á móti ertu að fá Breiðablik eftir sigurleik sem þjálfarinn þeirra var dulluósáttur með. Svo þeir mæta líklega trylltir eins og KR-ingar.“

Umræðan í heild er hér að neðan.