Starf Mathis Sammer hjá Dortmund ku heldur betur vera í hættu eftir ummæli sem hann lét falla um Jude Bellingham.

Sammer hefur séð um að ráðleggja yngri leikmönnum Dortmund og er það hans starf en hann er einnig fyrrum leikmaður liðsins.

Sammer tjáði sig um Bellingham á dögunum og í raun sagði það best fyrir leikmanninn að fara annað til að þróa leik sinn enn frekar.

Sammer sagði að Bellingham myndi fá betri menntun á Englandi eða á Spáni og að það væri ekki best fyrir hann að halda ferlinum áfram í Þýskalandi.

Stjórn Dortmund er bálreið út í Sammer fyrir þessi ummæli en félagið vill ekki losna við Bellingham sem er einn efnilegasti leikmaður heims.

Real Madrid og Liverpool eru sterklega orðuð við miðjumanninn sem er enskur landsliðsmaður aðeins 19 ára gamall.

Bild í Þýskalandi segir að Dortmund sé nú að undirbúa það að reka Sammer úr starfi sem var nálægt því að skrifa undir framlengingu til ársins 2025.