Það fór ekki framhjá mörgum að Ágúst Gylfason var látinn fara sem þjálfari karlaliðs Stjörnunnar í gær. Jökull Elísabetarson er tekinn við, en hann var aðstoðarmaður Ágústs. Lúðvík Jónasson, fyrrum leikmaður Stjörnunnar og harður stuðningsmaður liðsins, botnar ekki í því að Jökull hafi haldið starfi og ekki fengið að fjúka með Ágústi.

Stjarnan er aðeins með 3 stig eftir fyrstu sex leikina í Bestu deildinni og ákvað stjórnin að gera breytingar í brúnni.

„Fyrst þeir voru að reka á annað borð áttu þeir að reka Jökul líka. Það vita allir sem eru í kringum fótboltann í Garðabænum að hann er að sjá um allar æfingar og stýra upplegginu og annað. Gústi kannski velur liðið en allt annað er Jökull,“ segir Lúðvík í Dr. Football í dag.

Hann gagnrýnir Helgi Hrannar Jónsson formann meistaraflokksráðs Stjörnunnar og aðra sem ráða hjá félaginu.

„Ég sé engar breytingar í vændum. Ég veit ekki á hvaða vegferð þeir eru. Ég sé ekki vegferðina.

Fyrst að þeir ætluðu að gefa honum sex leiki hefðu þeir átt að reka hann í fyrra og ná í nýjan mann eða styrkja liðið.“

Stjarnan hefur undanfarið farið þá leið að gefa ungum mönnum tækifærið í meistaraflokki. Lúðvík er hlynntur því en segir aðra leikmenn sem hafa komið inn ekki nógu góða.

„Þeir eru með unga stráka og það er vegferðin. En það eru bara lélegir menn sem eru fengnir. Gummi Kristjáns er slakur og þeir leikmenn sem hafa komið eru slakir. Það eru fleiri leikmenn og það þarf ekkert að nafngreina einhverja ákveðna.“

Þá gagnrýnir Lúðvík upplegg Ágústs og Jökuls í byrjun tímabils.

„Þessir þjálfarar vita greinilega ekkert um mannskapinn sem þeir eru með. Þeir fá falleinkunn frá mér.“