Nokkrir leikmenn Víkings fóru degi fyrir leik til Vestmannaeyja til að hvíla sig betur fyrir leik liðsins gegn ÍBV á mánudag í Bestu deild karla. Með þessu vildu Víkingar reyna að hvíla menn betur og sleppa við bátsferð á leikdegi.

Þetta kom fram í Þungavigtinni en þar segir að Nikolaj Hansen framherji liðsins sem skoraði sigurmarkið á 95 mínútu hafi gist í Eyjum degi fyrir leikinn.

„Degi fyrir leik fara þeir leikmenn sem vilja og gista á hóteli og slaka á. Svona getur skilið á milli, Hansen var að sofa út í Eyjum. Hann skorar svo sigurmarkið, þetta telur,“ sagði Kristján Óli Sigurðsson í þættinum.

Mikael Nikulásson segir að sigur Víkings hafi sannað að þarna séu meistaraefnin.

„Ég kalla þetta meistaratakta, það er ekki vælt í eina sekúndu yfir grasvellinum. Þeir mæta með sitt besta lið og taka á Eyjamönnum eins og Eyjamenn taka á, Víkingar spila mjög góðan leik.“

Víkingur eru með fullt hús stiga eftir sex umferðir og hafa virkað afar sannfærandi, liðið hefur aðeins fengið á sig mark í einum leik.