Það er útlit fyrir að West Ham sé til í að leyfa fyrirliða sínum, Declan Rice, að yfirgefa félagið í sumar.

Hinn 24 ára gamli Rice hefur verið frábær fyrir West Ham í fleiri ár þrátt fyrir ungan aldur. Nú er útlit fyrir að kappinn haldi í stærra félag.

Rice á ár eftir af samningi sínum við West Ham en félagið getur hins vegar framlengt þann samning um eitt ár.

Í morgun var greint frá því að verðmiðinn á Rice sé 120 milljónir punda.

Arsenal er talið leiða kapphlaupið um miðjumanninn en flest ensk stórlið hafa þó áhuga á honum einnig.

Sky Sports segir þá frá því að West Ham hafi þegar lofað Rice því að félagið muni ekki standa í vegi fyrir því að hann fái að fara í lið sem spilar í Meistaradeild Evrópu. Það er draumur kappans að spila í þeirri keppni.

West Ham hefur nánast bjargað sér frá falli úr ensku úrvalsdeildinni þegar þrjár umferðir eru eftir. Þá er liðið komið í undanúrslit Sambandsdeildarinnar. Rice getur því lokið ferli sínum hjá West Ham með titli.