Gary Martin, leikmaður Selfoss í Lengjudeildinni, missti fyrirliðabandið fyrir þessa leiktíð. Guðmundur Tyrfingsson verður fyrirliði á komandi leiktíð. Gary skilur ákvörðun félagsins vel.
Hinn 32 ára gamli Gary var í ítarlegu viðtali við 433.is í dag. Selfoss undirbýr sig nú af kappi fyrir fyrsta leik Lengjudeildar karla á föstudag. Þar mætir liðið Aftureldingu á heimavelli.
Gary er á leið inn í sitt þriðja tímabil á Selfossi. Hann var spurður hvort hann finndi fyrir ábyrgð sem reynslumikill leikmaður í ungu liði.
„Nei, hún var tekin af mér,“ svaraði Gary og hló dátt. Átti hann þarna augljóslega við að fyrirliðabandið hafi verið tekið af honum.
Sóknarmaðurinn er þó ekki sár út í félagið. „Það er eins og það er. Félagið tók ákvörðun og ég skil hana.
Ég held að 90% af leikmönnum okkar séu ungir leikmenn frá Selfossi. Ef þú færð slíka ábyrgð þarftu að stíga upp.“
Gary segir gott fyrir börnin á Selfossi að sjá unga og uppalda leikmenn fá stór hlutverk í meistaraflokki.
„Ég hef verið að þjálfa undanfarið og það eru hundruðir barna sem gætu spilað fyrir Selfoss í framtíðinni. Ég skil að þau vilji nota ungan leikmann sem fyrirliða svo að börnin á Selfossi sjái að þau eigi möguleika.
Vonandi er þetta rétt ákvörðun hjá félaginu sem skilar mörgum leikmönnum upp.“
Viðtalið í heild má sjá í spilaranum hér að neðan.
433.is verður heimili Lengjudeildarinnar í sumar. Þar verður völdum leikjum lýst og markaþættir eftir hverja umferð.
