„Við skulum orða það þannig að Rúnar hefur eignast nýja óvini,“ sagði Hjörvar Hafliðason stjórnandi Dr. Football í nýjum þætti af hlaðvarpinu vinsæla.

Rætt er þar ummæli sem Rúnar Kristinsson þjálfari KR lét falla eftir tap gegn FH á laugardag í Bestu deild karla.

„Víkings leikurinn var jafn í fyrri hálfleik, þó einhverjir aðrir vilja meina eitthvað annað en það eru menn sem hafa ekkert vit á þessu,“ sagði Rúnar eftir leikinn.

Hjörvar telur að ummælin snúist um umfjöllun í Stúkunni á Stöð2 Sport þar sem Albert Brynjar Ingason er sérfræðingur og Guðmundur Benediktsson stjórnar þættinum

„Albert, Reyna fjölskyldan. Það er nýr maður kominn á listann, það er aftur leikmaður Lokeren sem veður í þig og mág þinn,“ segir Hjörvar og á þar við umræðu í kringum Arnar Þór Viðarsson, fyrrum landsliðsþjálfara þar sem Albert og Guðmundur voru ósáttir með framgöngu þjálfarans í máli Alberts Guðmundssonar.

„Við ætlum ekki að gera neitt, mér finnst þetta mjög spes ummæli. Ef þú skoðar alla umfjöllun um þennan leik þá er alls staðar talað um að KR hafi verið slakir í þessum leik. Þá er hann að segja allir sem sáu leikinn þannig, öðruvísi en hann, hafi ekki vita á fótbolta,“ sagði Albert.

Hjörvar telur að orð Rúnars snúist um fólk í sjónvarpinu. „Hann er að tala um ykkur í sjónvarpinu, stóru prímadonnurnar,“ sagði Hjörvar í léttum tón.