Eins og flestir vita er Age Hairede nýr þjálfari íslenska karlalandsliðsins og tekur við keflinu af Arnari Þór Viðarssyni.

Hareide er reynslumikill þjálfari og hefur komið víða við en hann þjálfaði til að mynda Kára Árnason, fyrrum landsliðsmann, hjá Malmö í Svíþjóð á sínum tíma.

Kári sem er núverandi yfirmaður knattspyrnumála Víkings R. hér heima ræddi við útvarpsþátt Fótbolta.net um hvernig mann við værum að ráða í starf.

Kári hafði ekkert nema góða hluti að segja um Norðmanninn sem hefur komið vel fyrir í viðtölum og á blaðamannafundum hingað til.

,,Þetta er bara alvöru gæi, þetta er svona authority figure og hann er rosalega viðkunnarlegur og skemmtilegur maður. Hann er charesmatic en líka grjótharður og ég held að þetta sé bara akkúrat það sem Ísland þarf. Þetta er ekki maður sem þú vilt reita til reiði,“ sagði Kári í þættinum.

,,Hann sýnir aðeins þá hlið þegar hann þarf á því að halda, þetta er flottur kall. Ég fýlaði hann frábærlega og hef ekki slæmt orð um hann að segja.“

,,Það var bara áhersla á að vinna í Malmö, sama hvernig við gerðum það og ég var mjög hrifinn af því en auðvitað vorum við með gríðarlega gott lið og héldum boltanum ágætlega.“

Kári var svo spurður út í frægan leik í Meistaradeildinni þar sem Malmö tapaði 8-0 gegn Real Madrid þar sem Cristiano Ronaldo skoraði fernu í öruggum sigri.

,,Það var chaos í kringum þann leik, það voru slagsmál í rútunni, við vorum með ungt lið og mikil meiðsli í þeim leik. Það eru engar afsakanir en þetta var hörmulegt performance sem hefur ekkert með hann að gera, hann gerði það besta úr því sem honum stóð til boða.“

,,Hafsentinn sem var með mér var meiddur, fyrirliðinn Marcus Rosenberg var meiddur og þar fram eftir götunum svo við stilltum upp mjög ungu liði sem var jafntframt mjög naive lið. Þetta var mjög dapurt og þessir ungu strákar voru ‘keen’ á að halda boltanum sem er heimskulegt gegn liði eins og Real Madrid.“