Það fór um marga þegar Hilmar Árni Halldórsson meiddist og hélt um hnéð í leik Stjörnunnar gegn FH í Bestu deild karla um síðustu helgi. Staðan á honum er hins vegar mun betri en menn þorðu að vona.
FH og Stjarnan áttust við á afar slæmum frjálsíþróttavelli fyrrnefnda félagsins. Í fyrri hálfleik virtist Hilmar festa sig í grasinu áður en hann féll til jarðar og hélt um hnéð. Kappinn missti af öllu síðasta tímabili vegna krossbandslita og því höfðu margir áhyggjur.
Hilmar hélt hins vegar leik áfram áður en honum var skipt af velli snemma í seinni hálfleik.
„Strax eftir leik höfðum við miklar áhyggjur. Hann bólgnaði upp á hnénu. Hann fór svo í gott tékk sem kom nokkuð vel út,“ segir Ágúst Gylfason, þjálfari Stjörnunar í samtali við 433.is í dag.
Stjarnan á leik gegn HK á mánudag en ekki er útséð með hvort Hilmar nái þeim leik.
„Hann æfði með okkur í gær og við tökum stöðuna um helgina. Það er von á honum von bráðar.
Hann verður kominn til baka fyrr en menn bjuggust við, hvort sem það verði í þessum leik eða næsta.“
Ágúst viðurkennir að það hafi farið um mannskapinn þegar Hilmar meiddist.
„Allir urðu hræddir og áhyggjufullir. Þetta augnablik var óþægilegt. Ég held að allir hafi haft áhyggur, ekki bara stuðningsmenn Stjörnunnar heldur knattspyrnuáhugafólk almennt.“
