Íslenski landsliðsmaðurinn Jóhann Berg Guðmundsson mun snúa aftur í deild þeirra bestu, ensku úrvalsdeildina, á næstu leiktíð. Hann viðurkennir að hafa haldið að tíma hans í deild þeirra bestu hafi verið lokið þegar lið hans, Burnley, féll fyrir tæpu ári síðan.
Jóhann og félagar í Burnley hafa verið stórkostlegir í ensku B-deildinni á þessari leiktíð. Vincent Kompany tók við sem aðalþjálfari eftir að liðið hafði fallið úr ensku úrvalsdeildinni síðastliðið vor. Miklar breytingar urðu á leikmannahópi og leikstíl liðsins og héldu flestir að Kompany þyrfti sinn tíma til að aðlaga sig og liðið að þeim.
Annað kom á daginn því Burnley hefur þegar tryggt sig upp í ensku úrvalsdeildina og er komið langleiðina með að sigra B-deildina. Liðið hefur í leiðinni vakið athygli fyrir skemmtilegan fótbolta.
Jóhann skrifaði undir nýjan samning við Burnley í janúar. Sá gildir út næstu leiktíð með möguleika á árs framlengingu.
„Það voru erfiðir dagar undir lok síðustu leiktíðar. Ég sagði fjölskyldu minni að ég myndi líklega ekki aftur spila í ensku úrvalsdeildinni. Það er erfitt að ræða þetta. Ég vissi ekki hvað myndi gerast. En teymið sem hefur komið inn hefur verið stórkostlegt. Ég er svo heppinn að fá að spila aftur í ensku úrvalsdeildinni,“ segir Jóhann í nýju viðtali.
Sem fyrr segir breytti Kompany miklu hjá Burnley og það kom mörgum á óvart hversu vel tókst til á skömmum tíma.
„Það var mikil óvissa farandi inn í tímabilið, margir leikmenn á förum. Þú vissir ekki hvað myndi gerast. Ég var að glíma við meiðsli og spilaði ekki margar mínútur. Það er því frábært hvað ég hef spilað mikið. Lengi megi það halda áfram.
Þetta hefur farið ansi vel en það fór líka mikil vinna í þetta. Teymið hefur verið vægðarlaust, fundir, mikill tími á vellinum. Þeir vita nákvæmlega hvað þeir vilja. Stjórinn er með sína hugmyndafræði og hann vildi koma inn með hana en þú veist aldrei hvað það tekur langan tíma í fótbolta. Þetta gerðist hraðar en margir hefðu haldið.“
Jóhann er afar spenntur fyrir því að snúa aftur í ensku úrvalsdeildina, deild sem hann þekkir svo vel.
„Ég vil spila í bestu deild í heimi, sem er enska úrvalsdeildin. Ég er kominn þangað aftur og vil láta á það reyna. Það verður áhugavert að sjá hvernig gengur með nýjum leikstíl líka,“ segir Jóhann, en hann spilaði allt öðruvísi fótbolta undir stjórn Sean Dyche hjá Burnley áður en Kompany tók við.
Landsliðsmaðurinn knái hefur engar áhyggjur af Burnley á næstu leiktíð.
„Ég held að við getum náð góðum árangri. Við njótum okkar þegar við spilum og við sjáum árangurinn. Við vitum samt að í úrvalsdeildinni þurfum við að lágmarka öll mistök. Enska úrvalsdeildin er ókunnug mörgum okkar en ég hef mikla trú á bæði leikmönnum og starfsfólki svo ég er viss um að við munum gera vel,“ segir Jóhann Berg Guðmundsson.
