„Mér líst alveg rosalega vel á þennan þjálfara. Ég held að allir sem hafi skoðað hans feril og hvað hann hefur gert sem þjálfari séu sammála mér um það að við höfum dottið í lukkupottinn með þessari ráðningu,“ segir Vanda Sigurgeirsdóttir formaður KSÍ um ráðninguna á Age Hareide í dag, en hann er tekinn við íslenska karlalandsliðinu.
Norðmaðurinn gerði samning út undankeppni EM 2024 en verður sá samningur framlengdur ef Ísland kemst í lokakeppnina.
Viðræðurnar gengu hratt fyrir sig að sögn Vöndu. „Við höfðum mikinn áhuga og hann einnig svo þetta gekk hratt fyrir sig.
Hann var búinn að skoða landsleiki og mjög áhugasamur.“
Það fóru engar alvöru viðræður fram við aðra þjálfara að sögn Vöndu. Nöfn Rúnars Kristinssonar og Steve Coppell hafa verið í umræðunni.
„Hann var sá þjálfari sem okkur langaði mest til að ráða svo það fóru engar viðræður í gang fyrir alvöru nema bara hann.
Varðandi Steve Coppell var hann aldrei á blaði. Þó ég beri mikla virðingu fyrir íslenskum þjálfurum þá vorum við að þessu sinni að leita að þjálfara með alþjóðlega reynslu. Þar af leiðandi beindum við sjónum okkar þangað.“
Ekki er útséð með það hverjir verða í teymi Hareide. Sem stendur er það þó óbreytt og Jóhannes Karl Guðjónsson aðstoðarþjálfari.
„Þeir eru allir enn að störfum og við erum að skoða það. Þjálfararnir ráða auðvitað sínu teymi.“
Viðtalið í heild má sjá hér að neðan.
