Jurgen Klopp stjóri Liverpool segir að félagið verði að vinna með það sem er til. Félagið virðist samkvæmt öllum fréttum hætt við að reyna að kaupa Jude Bellingham. Er hann of dýr biti fyrir Liverpool.

Bellingham verður til sölu fyrir 130 milljónir punda í sumar, Dortmund setur þá kröfu og Liverpool er hætt við. Klopp var pirraður á spurningum tengt þessu á fréttamannafundi í dag.

„Þú verður að vinna með það sem þú hefur,“ sagði Klopp þegar blaðamenn fóru að spyrja hann út í Bellingham.

„Þú segir ekki sem fimm ára krakki á jólunum að þú viljir fá Ferrari.“

„Það sem við þurfum, við munum reyna allt til þess að sækja það. En það koma tímar þar sem þú þarft að stíga til hliðar og viðurkenna að sumt er ómögulegt, og fara í aðra átt.“

Enska pressan reyndi að pressa á Klopp að tala almennt um Bellingham. „Svör mín eru ekki um Jude Bellingham,“ sagði Klopp og var pirraður.

„Ég skil ekki af hverju ég á að tala um hluti sem við getum ekki fengið, eins og sex leikmenn fyrir 100 milljónir punda hvern í sumar. Þú verður að vinna með það sem er hægt.“