Peter Schmeichel, fyrrum markvörður Manchester United, var allt annað en sáttur með sína menn eftir leikinn gegn Sevilla í Evrópudeildinni í gær.
Liðin mættust í fyrri leik sínum í 8-liða úrslitum á Old Trafford og gerðu 2-2 jafntefli.
Marcel Sabitzer kom United í 2-0 en Rauðu djöflarnir glutruðu forskotinu niður í lokin.
„Úrslitin eru sanngjörn miðað við hvernig leikurinn þróaðist í seinni hálfleik,“ segir Schmeichel.
„Nokkrir leikmenn þurfa að horfa í spegil eftir þennan leik og spyrja sig hvort þeir séu að koma með nóg að borðinu. Nokkrir leikmenn geta skammast sín fyrir frammistöðuna.“
Fáir leikmenn áttu góðan dag hjá United en Schmeichel hrósar nokkrum.
„De Gea spilaði vel. Hann átti tvær frábærar vörslur. Hann gat ekkert gert í mörkunum. Casemiro spilaði líka mjög vel í endurkomunni.
Besti maður vallarins var Marcel Sabitzer. Liðsfélagar hans brugðust honum. Hann leiddi með fordæmi en aðrir fylgdu ekki,“ segir Daninn.
„2-2 eru mjög svekkjandi úrslit sem stuðningsmaður United. Ég er mjög vonsvikinn því þetta hefði átt að vera 5-0 sigur.“
Seinni leikur liðanna fer fram á fimmtudag.
