Hjörvar Hafliðason, Dr. Football leggur til að KSÍ opni á samtalið við Freyr Alexandersson þjálfara Lyngby um að taka við landsliðinu.

Freyr starfaði lengi vel í kringum landsliðið þegar Lars Lagerback og Heimir Hallgrímsson voru með liðið, hann var svo aðstoðarmaður Erik Hamren.

Freyr kom til greina sem landsliðsþjálfari þegar Hamren hætti en stjórn KSÍ á þeim tíma ákvað að ráða Arnar Þór Viðarsson.

Nú er leitað að eftirmanni Arnars og virðist stjórn KSÍ ætla að leita í reyndan erlendan þjálfara. „Mig langar að opna eitt samtal, það er Freyr Alexandersson. Ekki segja Freysa að ég hafi sagt þetta en Lyngby eru svo gott sem fallnir, þeir eru níu stigum á eftir og besti leikmaðurinn þeirra er meiddur,“ sagði Hjörvar Hafliðason.

Freyr er á sínu öðru tímabili með Lyngby og kom liðinu upp í úrvalsdeild en virðist vera að falla beint aftur niður.

„Hann væri frábær kandíat í þetta, hann reið ekkert húsum með þetta kvennalandsliðið. Hann er eflaust miklu betri þjálfari í dag og veit miklu meira í dag. Þurfum við ekki að opna það samtal?,“ segir Hjörvar.

Jóhann Már Helgason heldur að Freyr yrði góður kostur og gæti sameinað þjóðina. „Hann hefur talað um það að vera alinn upp í KSÍ, þá er ég að tala um eldkírnina sem hann fékk í kringum þetta lið. Er með Lars og Heimi, hann er afskaplega vel liðinn af leikmönnum. Hann mundi kunna þá list að fá þjóðina á bak við sig.“

Hjörvar bendir á að Freyr sé ekki valtur í sessi þrátt fyrir að fall blasi við. „Það vill enginn losna við hann frá Lyngby, það eru allir mjög sáttir. Ég þekki tvo sem halda með Lyngby og það er enginn að tala um að losa Frey.“

„Það er búið að ákveða að þetta á að vera reynslumikill þjálfari, við erum að tala um einhvern yfir sextugt,“ sagði Hjörvar.