Breiðablik tapaði fyrsta leik tímabilsins í Bestu deildinni gegn HK á dramatískan hátt í Kópavogi í gær. Stúkan á Stöð2 Sport gerði upp leikinn.

Eftir að hafa lent 2-0 undir í leiknum komu Blikar til baka og tóku 3-2 forystu þegar skammt var eftir. HK kom hins vegar aftur til baka og vann 4-3 sigur.

Klæmint Olsen, Oliver Stefánsson og Alex Freyr Elísson voru á meðal leikmanna sem ekki komust í hóp hjá Blikum í gær.

„Klæmint fer á lán til að vera í landsliðinu, hann getur ekki verið í neðri deildum í Færeyjum. Hann getur þá ekki verið utan hóps heldur, það hlýtur að vera betra að vera í B-deild. Hann er frábær í klefanum segja þeir,“ sagði Albert Brynjar á Stöð2 Sport í gærkvöld.

Lárus Orri Sigurðsson tók þá til máls. „Það er búið að tala um lið sem hafa ekki styrkt sig nóg eins og Víkingur, við erum hræddir um þá út af hópnum og Evrópukeppni. Lið eins og HK, Fylkir og fleiri sem hafa ekki styrkt sig nóg og eru með of litla hópa.“

„Með Breiðablik þá erum við að tala um of stóran hópnum, Óli Jó var með okkur í upphitunarþættinum. Sigursælasti þjálfari Íslands og hann talaði um þetta. Það getur verið erfitt að halda mönnum ánægðum, þegar þú ert ekki með varaliðskeppni þá er erfitt að halda mönnum match fit. Þetta verður ekki einfalt fyrir Óskar, það er lúxusvandamál fyrir Óskar,“ sagði Lárus.

„Þetta væri eini veikleikinn sem hann sá,“ sagði Guðmundur Benediktsson sem stýrði þættinum.

Albert Brynjar segir að mögulega sé Óskar Hrafn eini þjálfarinn sem vonist eftir meiðslum hjá leikmönnum. „Hann hefur talað um að þetta verði vandamál ef allir verða heilir, ég held að hann sé eini þjálfarinn í deildinni sem vonast eftir nokkrum meiðslum.“