Besta deild karla hefst á morgun með heilli umferð og er eftirvæntingin mikil.

Leitað var til stuðningsmanna liðanna í deildinni og lagður fyrir þá spurningalisti.

Við hefjum leik á nýliðum Fylkis, en fulltrúi þeirra er skemmtikrafturinn og athafnamaðurinn Björn Bragi Arnarsson.

Hvernig líst þér á sumarið hjá þínu liði?
Gríðarlega vel. Árbæingar eru bestir þegar enginn hefur trú á þeim.

Hvernig finnst þér hafa gengið að styrkja leikmannahópinn?
Liðið hefur kannski lítið styrkt sig en það eru margir Árbæingar þarna og það er allt sem ég bið um. Óli Kalli Finsen kemur svo inn með gríðarlegan andlegan styrk. Það er jafngildi þess að fá Mr. Miyagi úr Karate Kid í leikmannahópinn.

Hver er uppáhalds leikmaðurinn þinn í liðinu?
Kristján Valdimarsson verður alltaf uppáhalds leikmaðurinn minn þótt það séu reyndar nokkur ár síðan hann spilaði síðast. En ég held í vonina um að hann taki aftur fram skóna í sumar. Ef það gerist þá verðum við meistarar.

Ertu duglegur að mæta á völlinn hjá þínu liði?
Ég var alltaf mjög duglegur en hefði alveg mátt vera öflugri síðustu tímabil.

Fyrir utan heimavöllinn hjá þínu félagi, hvar er skemmtilegast að fara á völlinn?
Kaplakriki kemur fyrst upp í hugann. Sérstaklega þegar Friðrik Dór er á mæknum.

Hvað finnst þér um fyrirkomulagið í Bestu deildinni sem var prófað í fyrsta sinn á síðustu leiktíð?
Ég var kannski ekkert að elska það í fyrra. En líklega var það aðallega af því að deildin var svo óspennandi. Það er rétt að gefa því lengri séns.

Hvaða lið verður Íslandsmeistari?
Fylkir.