Það hefur alveg verið betra stuð í Íþróttaviku stúdíóinu en Tómas Þór Þórðarson, ritstjóri enska boltans hér á fróni, kom og fékk sér sæti ásamt Herði Snævari Jónssyni, íþróttafréttastjóra Torgs. Ástæðan fyrir stuðleysinu var tap Íslands gegn Bosníu en framundan er leikur gegn Liechtenstein á sunnudag.
Hörður Snævar fór yfir sviðið með landsliðsmönnunum og sagði það væri ekki að það sama að spila með Burnley, sem er yfirburðarlið í ensku Championship deildinni og vera kominn á miðjuna hjá íslenska landsliðinu í Austur Evrópu.
„Þegar við vorum að ná árangri voru okkar menn að spila í liðum sem þurftu að ná í úrslit. Aron Einar var í Cardiff, Jói Berg var í gamla Burnley og Kári í Rotherham. Gylfi var í Swansea og Everton og þeir þurftu að hafa fyrir sigrunum.
Þá vorum við með leikmenn sem þurftu að spila svolítið íslenskan fótbolta til að vinna og kunnu það. Núna erum við með leikmenn í verri liðum, miðað við þá, og í lélegri deildum en þeir eru samt aðalmennirnir í þeim liðum. Okkur vantar menn að spila á hærra getustigi þar sem er verið að hafa fyrir sigrunum.“
Tómas segir að hann vonist alltaf til að bláa treyjan skipti svo miklu máli að eitthvað gerist þegar leikmenn mæta í landsliðsverkefni „Það þarf að búa til þann kúltur og það hugarfar. En það má ekki gleyma og Arnar Þór mun ekki komast undan því að leikmenn og allt í kringum það er búið að skófla í burtu því það átti að byggja upp á nýtt. Það var hans val.“ Hann benti á að Íslenska landsliðið hafi verið með 60 prósent með boltann í leiknum.
Hörður greip boltann á lofti og sagði að Arnar hafi verið yfirmaður knattspyrnumála þegar hann var ráðinn landsliðsþjálfari og hafi því verið sinn eigin yfirmaður. „Hann hefði kannski þurft að hafa sterkan yfirmann því þáverandi formaður sem ræður hann lendir í sínum vandræðum og inn kemur formaður sem hefur enga þekkingu. Það hefði mögulega átt að stoppa Arnar í því að henda út öllu þessu starfsfólki. Hann var jú yfirmaður sjálfs síns.“
Tómas var sammála og sagði að einhver hefði þurft að spyrja spurninga um allar ákvarðanir Arnars Þórs. „Einhver hefði þurft að spyrja; Af hverju ertu að losa Lars? Og svarið væri kannski að þeir væru ekki að dansa í takt. En þarna hefði þurft að stíga inn og fá útskýringu af hverju Lars væri að fara. Ég vil fá útskýringu á af hverju þessi eða hinn sé að fara og stundum jafnvel sagt bara nei.“
