Helgi Fannar Sigurðsson skrifar frá Liechtenstein

Á morgun spilar íslenska karlalandsliðið sinn annan leik í undankeppni EM 2024. Andstæðingurinn er Liechtenstein. Landsliðsþjálfarinn Arnar Þór Viðarsson og fyrirliðinn Aron Einar Gunnarsson sátu fyrir svörum á fréttamannafundi í dag.

Það hefur verið reiði hjá íslensku þjóðinni eftir 3-0 tap íslenska liðsins gegn Bosníu-Hersegóvínu á fimmtudag.

Mikið er fjallað um Arnar en hann les hins vegar lítið af því.

„Ég hef haft þá reglu alveg frá því ég var leikmaður að ég les ekki mikið af fréttum þegar ég veit að þær eru um mig.

Ég er ekki fæddur í gær. Ég les nánast ekkert en ég er mjög meðvitaður um það að fólk er fúlt. Við erum það líka.“

Arnar vill einbeita sér að leiknum við Liechtenstein eins og er og fara yfir Bosníuleikinn síðar.

„Við þurfum að gera okkur grein fyrir því að þetta var erfiður útileikur. Við erum hundfúlir yfir að hafa ekki náð að gera betur. Ég þarf hins vegar að beina þessari umræðu frá mér núna og einbeita mér að því sem ég þarf að gera. Það er að undirbúa liðið fyrir morgundaginn. Þegar það er búið er ekkert mál að ræða alls konar hluti.“