Elvar Geir Magnússon, ritstjóri Fótbolta.net, telur útilokað að Arnar Þór Viðarsson, landsliðsþjálfari karla í knattspyrnu, getið unnið stuðningsfólk landsliðsins aftur á sitt band. KSÍ hljóti að hugleiða að leysa hann frá störfum. Þetta kemur fram í pistli á Fótbolta.net.
Öll spjót standa nú á landsliðsþjálfaranum eftir afleita frammmistöðu liðsins í leik gegn Bosníu í gær, en leikurinn tapaðist 0-3. Margir stuðningsmenn voru sérstaklega slegnir yfir slökum varnarleik liðsins en þéttur varnarleikur hefur verið aðalsmerki íslenskra knattspyrnulandsliða um árabil.
Elvar segir að KSÍ beri skylda til að skoða málið ofan í kjölinn og velta upp þeim möguleika hvort segja eigi upp þjálfaranum. Hann skrifar:
„Stjórn KSÍ er að bregðast ef hún tekur ekki alvöru fundi núna og skoðar málin ofan í kjölinn. Hjá svona litlu sambandi verður fólk mjög náið en það verður að leggja allar tilfinningar til hliðar og spyrja sig hvort vegferðin sé rétt og framfarirnar nægilegar. Arnar hefur fengið tíma til að móta nýtt lið og nýjar hugmyndir en spilamennskan hefur verið slök og úrslitin léleg. Það er ekki hægt að skýla sér endalaust bak við orðið uppbygging. Vanda formaður hefur sjálf sagt að nú séu verk Arnars lögð fyrir dómstóla.“
Elvar segir að óvinsældir Arnars séu slíkar að KSÍ verði að hlusta á þær óánægjuraddir. Óvinnandi verk sé fyrir Arnar að vinna íslenska knattspyrnuáhugamenn á sitt band:
„Skoðun yfirgnæfandi meirihluta íslenskra fótboltaáhugamanna er sú að Arnar eigi að víkja. Óvinsældir hans meðal stuðningsmanna Íslands eru miklar og stjórn KSÍ hlýtur að þurfa að hlusta á þessar raddir en stinga höfðinu ekki í sandinn. Landsliðið er ekki einkamál KSÍ og starf Arnars hlýtur að hanga á bláþræði. Þetta er fólkið sem mætir á völlinn og tekur Víkingaklappið. Ég held því miður að það sé óvinnandi verk fyrir Arnar að vinna fólkið á sitt band.“
Elvar bendir á að Heimir Hallgrímsson hafi verið tilbúinn að taka við liðinu í fyrra en KSÍ hafi skort kjark til að taka það skref. Hann telur ennfremur að á vakt Arnars hafi glatast þekking og reynsla sem nýliðin gullaldarár landsliðsins gáfu af sér, enda séu allt aðrar áherslur núna varðandi liðið:
„Einhverra hluta vegna var mörgu af því sem skilaði okkur sögulegri velgengni og þátttöku á tveimur stórmótum kollvarpað. Hugmyndafræðin er allt önnur, áherslurnar aðrar og nánast allir sem voru í kringum liðið horfnir á braut. Þekking hefur tapast og það er eitthvað sem erfitt er að kyngja. Allt fótboltasamfélagið á Íslandi ber ábyrgð á því að gullaldarárin hafi ekki skilið meira eftir sig.“
Elvar segir það vera lítilmannlegt að afskrifa sæti á næstu EM enda séu sumir andstæðingar okkar í undanriðlinum í tómu tjóni, t.d. Slóvakía. „Árangur næst aldrei ef ekki er hugsað stórt,“ segir ritstjórinn og hvetur til breytinga.
