Hörður Magnússon, fyrrum landsliðsmaður í knattspyrnu og lýsandi á Viaplay vonar að Hákon Arnar Haraldsson geti gert svipaða hluti fyrir íslenska landsliðið og Gylfi Þór Sigurðsson gerði á sínum tíma.

Hákon Arnar er vonarstjarna Íslands í fótbolta en þessi 19 ára leikmaður hefur spilað frábærlega með FCK í Danmörku og stærri lið hafa áhuga.

„Það er ekki raunhæft að gera kröfu um sigur í Bosníu en það væri stórkostlegur bónus ef það yrði, myndi setja okkur upp í góða stöðu í riðlinum,“ sagði Hörður í samtali við RÚV fyrir leikinn gegn Bosníu í undankeppni EM í kvöld.

„Jafntefli væri flott niðurstaða, fjögur stig í þessum tveimur leikjum myndu gera mikið fyrir liðið,“ segir Hörður en liðið mætir Liechtenstein á sunnudag.

Hákon Arnar eins og fyrr segir hefur spilað vel undanfarið. „Hann er búinn að vera frábær hjá FCK. Hann er að verða okkar skærasta vonarstjarna og taka við því hlutverki sem Gylfi Þór Sigurðsson var lengi í. Það er unun að horfa á drenginn spila fótbolta.“

Hörður er hins vegar ekki vongóður um að íslenska liðið fari á EM í Þýskalandi á næsta ári. „Ég tel það ólíklegt að við komumst á EM, ég held að við séum ekki alveg komnir þar sem við vorum fyrir nokkrum árum. Það getur allt gerst, þetta er ekki snúnasti riðilinn.“