Arnar Þór Viðarsson, landsliðsþjálfari Íslands segir það vonbrigði að Albert Guðmundsson hafi ekki viljað sæti í landsliðshópnum á sömu forsendum og aðrir leikmenn.

Albert er ekki í hópnum sem kynntur var rétt í þessu.

„Ég hringdi í Albert og við ræddum saman. Niðurstaðan er sú að ég vel hann ekki að þessu sinni,“ segir Arnar Þór.

Meira:
Landsliðshópur Íslands – Albert Guðmundsson og Birkir Bjarnason ekki í hópnum

Arnar Þór setti Albert úr hópnum síðasta haust og sagði hann hugarfar leikmannsins ekki gott.

„Það eru vonbrigði að hann sé ekki tilbúinn til að koma inn í landsliðið á forsendum liðsins. Þessar forsendur eru þær sömu fyrir alla leikmenn, hvort sem þú ert 19 ára eða 34 ára. Það er fullt af leikmönnum með mikla hæfileika í þessum landsliðshópi,“ segir Arnar.

„Akkúrat núna er marsverkefnið okkar framundan, ný undankeppni að byrja, og þá er mikilvægt að vera með fókus á það verkefni og þann hóp sem við erum með. Það ætlum við að gera, ég og þjálfarateymið, starfsliðið og leikmennirnir, allir saman sem eitt lið.“