Guðjón Guðmundsson, íþróttafréttamaður á Sýn var gestur í Íþróttavikunni með Benna Bó á Hringbraut á laugardag ásamt Herði Snævar Jónssyni, íþróttastjóra á Torgi.

Rætt var um komandi landsleiki hjá karlalandsliðinu í fótbolta en liðið er að hefja leik í undankeppni Evrópumótsins 2024. Albert Guðmundsson leikmaður Genoa hefur verið í kuldanum undanfarið.

Albert hefur spilað frábærlega síðustu vikurnar en Arnar Þór ákvað að hætta að velja Albert og sagði hugarfar hans í verkefnum ekki hafa verið gott.

„Þarna þarf landsliðsþjálfarinn að brjóta odd á oflæti sínu og hafa samband við leikmanninn sjálfur, hann getur ekki ætlast til þess að leikmaðurinn sjálfur hringi í hann og slíðri sverðin. Hann verður að leysa málið,“ segir Gaupi.

„Hann er maður að meiri ef hann gerir það, íslenska landsliðið er í þeirri stöðu í dag í fótbolta að það er möguleiki að fara í gegnum þennan riðil. Til þess þarf að hafa alla okkar bestu menn, íslenska landsliðið hefur ekki efni á því að vera án Alberts í þessu verkefni. Mér finnst allt þetta mál til háborinnar skammar.“

„Mér finnst Arnar stundum hrokafullur í svörum og allri sinni nálgun en hann hefur verið á uppleið með liðið. Hann þarf að brjóta odd á oflæti sínu og taka upp símann.“

Hörður Snævar segir Albert hafa alla hæfileika heimsins til að nýtast landsliðinu en sér málið ekki leysast í bráð.

„Ég tel útilokað að Albert verði í hópnum, hnúturinn er þannig bundinn að það gæti reynst erfitt að leysa hann. Albert hefur alla þá hæfileika sem til þarf til að vera einn besti leikmaður liðsins. Ég held að þetta mál hafi hins vegar hjálpað Arnari að stíga niður fæti innan hópsins,“ segir Hörður.

„Ef þetta á að leysast þarf þjálfarinn að hafa frumkvæðið að því. Ég sé hann ekki vera í hópnum sem verður valinn.“

Umræðan er í heild hér að neðan.