Antonio Conte segist einbeittur á að klára tímabilið vel með Tottenham en gefur ekkert upp um framtíðina.

Conte hefur verið mikið í umræðunni undanfarið. Samningur hans rennur út eftir tímabilið en gengið hefur ekki verið upp á marga fiska undanfarið og þykir Tottenham spila neikvæðan bolta undir hans stjórn.

„Félagið veit vel hver staðan er. Ég tala við Fabio Paratici á hverjum degi og á í góðu sambandi við stjórnarformanninn.

Við þurfum þolinmæði en ég sé enga. Ef ég sé að þolinmæðin er farin verð ég að sjá hvað gerist. Ég er til í að deyja fyrir þetta félag.

Við erum stundum of linir. Ég er þjálfarinn og ber ábyrgð á stöðunni. Ég verð að næta liðið og andann. Það hefur gerst áður og ég vona að við komumst þangað aftur.“

Richarlison, leikmaður Tottenham, virtist skjóta á Conte í viðtali á dögunum fyrir að byrja ekki fleiri leiki.

„Ég horfði á viðtalið við Richarlison, hann var ekki að gagnrýna mig. Hann var að segja að tímabilið sitt hefði verið lélegt,“ sagði Conte.

„Tímabilið hans hefur ekki verið gott, hann hefur verið meiddur, hann hefur spilað og skorað í Meistaradeildinni en fór síðan á HM og meiddist illa.“

Richarlison var keyptur frá Everton á 60 milljónir punda í sumar en á enn eftir að skora.

„Það er ekkert mark komið, hann var heiðarlegur þegar hann sagði að tímabilið hefði ekki verið gott. Tímabilið er ekki búið og ef hann á skilið að spila þá fær hann tækifæri.

Undir lok viðtalsins gerir hann mistök og fer að tala um sjálfan sig en ekki liðið. Þá er hann sjálfselskur, ég hef sagt leikmönnum það að ef þeir vilja ná árangri og vinna titla. Þá þarf að tala um okkur en ekki sjálfan sig.“