Rúnar Kristinsson er gestur í nýjasta þætti 433.is, sem sýndur er á Hringbraut öll mánudagskvöld. Fjármál KR hafa verið í umræðunni og voru þau tekin fyrir í þættinum.

Ársreikningur knattspyrnudeildar KR var opinberaður í síðustu viku. Þar kom í ljós 26 milljóna króna tap í rekstrinum.

„Ég held að þetta sé svona á hverju ári, hjá flest öllum félögum á Íslandi. Þetta er eilíf barátta,“ segir Rúnar.

„Ef KR er annars vegar er það fréttaefni. Því er alltaf slegið upp. Það eru fleiri félög á Íslandi sem eru að skila svipuðum tölum eða jafnvel meira tapi. Það þykir kannski ekkert sérstaklega fréttnæmt.“

Rekstur knattspyrnufélaga á Íslandi er erfiður og stundum þurfa menn að taka áhættur.

„Ef við náum ekki Evrópukeppni sjá menn fram á stórt gat. Menn eru stundum að taka smá sénsa og stefna á að vera í topp þremur. Þannig hefur þetta alltaf verið í KR,“ segir Rúnar, en KR hafnaði í fjórða sæti á síðustu leiktíð og verður því ekki í Evrópukeppni í ár.

Rúnar segir að KR geti ekki boðið leikmönnum sem koma til félagsins háar fjárhæðir og þurfi því að selja leikmönnum annars konar hugmyndir.

„Það sem hefur gert það að verkum að við erum aðeins seinni til að ná í leikmenn og finna þá leikmenn sem við viljum fá, það hefur að gera með hvað er til á markaðnum og hvað við getum gert. Í hvaða baráttu viljum við fara? Ég tel mig vera skynsaman mann og maður vill passa sig að við séum ekki að æða í of stóra bita sem við ráðum ekki við. Ég vil frekar fá leikmenn sem virkilega vilja koma í KR. Við getum ekki alltaf selt þeim hugmynd um háar fjárhæðir. Við viljum frekar selja þeim hugmynd um aðstöðu eða sögu félagsins.

Svo þegar önnur lið eru á undan að sækja stærstu bitana geta þau ekki endalaust fyllt á tankinn hjá sér. Leikmenn þurfa því líka að horfa í hvar mesti möguleikinn er á að fá að spila, þróast sem leikmenn. Þetta snýst ekki bara um peninga. Þú verður aldrei ríkur á því að spila fótbolta á Íslandi.“

Umræðuna, sem og þáttinn í heild, má sjá í spilaranum hér að neðan.