„Það er aldrei öll von úti,“ sagði Katrín Jakbosdóttir forsætisráðherra um sigur Liverpool í gær þegar hún mætti á Bylgjuna í morgun.
Katrín er mikill stuðningsmaður Liverpool en aðrir á hennar heimili styðja sigursælasta lið Englands, Manchester United.
„Þegar fólk spyr mig af hverju heldur þú áfram í stjórnmálum, þá spyr ég af hverju ég haldi áfram með Liverpool? Þetta er svolítið eins, hæðir og lægðir en maður er alltaf í réttu liði.“
Liverpool er að rétta úr kútnum eftir erfiðar vikur og hefur sem dæmi unnið þrjá deildarleiki í röð og er komið á fulla ferð í baráttu um Meistaradeildarsætið.
Jurgen Klopp stjóri Liverpool er í miklu uppáhaldi hjá Katrínu. „Ég hef verið mikill aðdáandi Klopp en þetta hefur ekki gengið vel, ég bý við það að búa með Manchester United aðdáendum. Þeir segja að hann sé búinn, ég hef staðið með honum.“
Liverpool og Manchester United eigast við á sunnudag og má því búast við fjöri á heimili Katrínar.
