Einar Kárason, rithöfundur og Framari, var gestur Íþróttavikunnar með Benna Bó á föstudaginn ásamt Herði Snævari Jónssyni, íþróttastjóra Torgs. Þar var farið yfir víðan völl í heimi íþróttanna.

Eftir síðasta tímabil var kunngert að fyrrum landsliðs- og atvinnumaðurinn Ragnar Sigurðsson kæmi inn í þjálfarateymi Fram og vöktu vendingarnar mikla athygli.

,,Raggi er að stíga sín fyrstu skref í þjálfun. Við getum sagt að þetta sé einn af mest spennandi hlutum til þess að fylgjast með á komandi tímabili, hvernig þetta verður,“ sagði Hörður Snævar.

Varnarleikurinn hafi kannski verið það sem mætti einna helst gagnrýna hjá Frömurum á síðasta tímabili, ef það ætti að gagnrýna eitthvað.

,,Þarna ertu kominn með einn af bestu varnarmönnunum í sögu íslenska landsliðsins í knattspyrnu og ég heyrði það frá einum í vikunni að Ragnar væri að gera fína hluti þarna, væri að stilla þá af og kenna þeim fræðin.

Ég held að þetta geti gengið vel og Jón Sveinsson, þjálfari Fram virðist vera alveg með þetta þarna. Þeir fylgja honum í einu og öllu.“

Einar, sem er mikill stuðningsmaður Fram segir ákveðinn klassa yfir því að Ragnar sé kominn í félagið.

,,Það er náttúrulega engin reynsla komin á Ragnar Sigurðsson sem þjálfara, hins vegar er rosalegur klassi yfir þessu bæði fyrir liðið og strákana, að fá svona stjörnu inn úr gullaldar landsliðinu. Ég er geysilega ánægður með þetta.“

Nánari umræði má sjá hér fyrir neðan: