Henry Birgir Gunnarsson settist í settið í Íþróttavikunni með Benna Bó sem sýnd er á Hringbraut alla föstudaga. Þar var einnig Hörður Snævar Jónsson, fréttastjóri íþróttafrétta á Torgi.

Það kom í ljós hreint lygileg saga á dögunum þegar Claudio Reyna og eiginkona hans Danielle viðurkenndu að hafa látið knattspyrnusamband Bandaríkjanna vita af ofbeldi sem Gregg Berhalter landlsiðsþjálfari Bandaríkjanna beitti eiginkonu sína fyrir 31 ári. Allt kom það til vegna þess að sonur þeirra, Giovanni Reyna var í aukahlutverki hjá Bandaríkjunum á HM í Katar.

Claudio og Danielle eru miklir vinir landslisðþjálfarans.

„Þetta er lygileg saga. Hann er í byrjun látinn vita að hann verði í einhverju aukahlutverki. Þá fer mamma bara í símann og hringir í formanninn og spyr hvað sé í gangi,“ segir Hörður.

„Þegar mótinu er lokið fer Berhalter á ráðstefnu þar sem hann er að ræða við mann og annan um að hann hafi verið að spá í að senda einn leikmann heim af mótinu, sem var Gio Reyna. Samdægurs tekur Danielle upp símann og hringir í formanninn og segir frá því að árið 1991 hafi Berhalter ráðist á konuna sína, sparkað í hana á bar eftir eitthvað ölæði.

Að mamma fullorðins atvinnumanns í fótbolta, sem leikur fyrir Borussia Dortmund, hann verður brennimerktur allan sinn feril.“

Henry var steinhissa.

„Þau eru búin að vera vinir í 30 ár. Þau fórna öllu og eyðileggja fyrir stráknum, þetta er svo galið.“