Íþróttaárið var gert upp í Íþróttavikunni með Benna Bó þetta skiptið. Íþróttastjóri Torgs, Hörður Snævar Jónsson, mætti í settið ásamt þeim Val Gunnarssyni, Braga Þórðarsyni og Tómasi Þór Þórðarsyni.
HM í Katar er nýlokið og varð Argentína heimsmeistari. Málefnin utan vallar stóðu þó hátt á mótinu í Katar.
„Þetta er sama óbragðið og ég fékk í munninn þegar formúlan fór til Sádi-Arabíu,“ segir Bragi en hann taldi mótið gott innan vallar.
„Það voru fluttir inn einhverjir Indverjar til að vera áhorfendur, hálf-tómir vellir.“
Hörður var hrifinn af mótinu í Katar.
„Þetta var frábært mót fyrir íslenska sjónvarpsáhorfendur. Þegar leikirnir voru 10, 13, 16 og 19. Það var frábært.“
Valur tók til máls. „Mér fannst þetta frábært mót. Ég veit ekki af hverju má ekki segja það.“
Sú umræða kom upp í settinu að gott væri að halda HM að vetri til þar sem leikmenn væru ferskari. Tómas var ekki sammála þessu.
„Ég hef ekki enn þá upplifað það að leikmenn séu þreyttir á sumrin. Þannig mér finnst sú umræða skrýtin. Það má ekki gleyma því að félögin borga leikmönnunum.“
Umræðan í heild er hér að neðan.
