Íþróttaárið var gert upp í Íþróttavikunni með Benna Bó þetta skiptið. Íþróttastjóri Torgs, Hörður Snævar Jónsson, mætti í settið ásamt þeim Val Gunnarssyni, Braga Þórðarsyni og Tómasi Þór Þórðarsyni.
Gianni Infantino forseti FIFA hefur legið undir gagnrýni í kringum HM í Katar. Hann var til umræðu í þættinum.
„Trúðurinn Infantino vill núna halda HM á þriggja ára fresti,“ segir Benedikt.
Arsene Wenger fyrrum stjóri Arsenal er hliðhollur Infantino, en Frakkinn starfar við framþróun fótboltans hjá FIFA.
„Fyrst var hann að koma með alls konar góða punkta en nú er hann bara að segja eitthvað,“ segir Tómas um Wenger.
Peningar virðast skipta æ meira máli í fótboltanum. Evrópumót karla hefur verið stækkað og það sama stendur til með HM. Þá eru teikn á lofti um 32 félagsliða HM.
„Á endanum hlýtur eitthvað að gefa eftir. Evrópumót með fleiri liðum er leiðinlegra, HM með fleiri liðum verður leiðinlegra,“ segir Hörður.
„Maðurinn er bara að missa vitið uppi í þessum fílabeinsturni,“ segir Tómas um Infantino.
Valur tók til máls. „Mér finnst það bara svo sorglegt að við séum farin að líta á það sem sjálfsagðan hlut að það sé spilling innan FIFA.“
Umræðan í heild er hér að neðan.
