Walid Ragragui, landsliðsþjálfari Marokkó, hefur svarað gagnrýnisröddum sem hafa heyrst yfir leikstíl liðsins á HM í Katar.

Marokkó spilar alls ekki skemmtilegan bolta en er komið í undanúrslit mótsins og spilar við Frakkland í kvöld.

Marokkó er lítið með boltann og skapar fá tækifæri en það er eitthvað sem Ragragui er alveg sama um svo lengi sem hans lið vinnur sína leiki.

,,Það eru margir Evrópubúar sem hafa gagnrýnt okkar leikstíl en það er því þeir eru ekki hrifnir af Afríkuþjóð sem spilar sniðugan leik,“ sagði Regragui.

,,Þeir hugsa að Afríkuþjóðir eigi að vera skemmtilegar en detta úr leik að lokum. Þessir dagar eru liðnir, það er ekki bara ein leið til að vinna.“

,,Sjáið Frakkland gegn Englandi, þeir sköpuðu ekki 40 tækifæri, þeir nýttu þau sem þeir fengu. Mér er alveg sama um XG tölfræðina eða hversu mikið við erum með boltann.“