Fyrrum landsliðsmarkvörðurinn Hannes Þór Halldórsson var með marga bolta á lofti haustið 2020. Hann var þá að leikstýra kvikmyndinni Leynilögga og einnig að spila með Val og landsliði Íslands.

Hannes lýsir því í hlaðvarpsþættinum Chess After Dark þegar hann var á tæpasta vaði með að ná æfingu Vals daginn fyrir leik þar sem hann var við tökur á Leynilöggu. Hann mátti alls ekki missa af æfingunni.

Kappinn segir frá því að hann hafi átt að mæta á æfingu 11:15 en fyrst hafi þurft að taka upp bílaeltingaleik í Leynilöggu.

„Klukkan var tuttugu mínútur í ellefu og það tekur tuttugu mínútur að keyra þetta allavega. Ég hugsaði að ég yrði bara að gera þetta og taka afleiðingunum ef þetta klikkar,“ segir Hannes í Chess After Dark.

„Við tókum þetta og erum komnir á bensínstöðina í Garðabænum þegar það eru níu mínútur í æfinguna á Hlíðarenda.“

Frænka hans var mætt þar sem tökum á senunni lauk til að skutla honum á æfinguna.

„Ég sest upp í bíl hjá frænku minni sem var að vinna í myndinni. Ég var búinn að segja við hana að hafa hurðina opna á þessari bensínstöð og svo brunum við. Ég var á bakinu á henni allan tímann. Ég á ekki að segja frá þessu en hún braut allar reglurnar í bókinni og það ískraði í dekkjunum þegar við fórum yfir ljós. Þetta var eiginlega senan sem við vorum að skjóta.“

Þetta hafðist allt saman að lokum.

„Við fórum yfir á öllum rauðum. Svo mæti ég og það eru þrjár mínútur í æfingu. Ég er orðinn heimsmeistari í að klæða mig hratt í æfingafötin. Það voru menn sem vissu hvað væri að gerast. Siggi sagði við mig „ef þú hefðir ekki komið á þessa æfingu værir þú búinn hérna.“ Ég var fyrstur út á völl. Það var sigurstund. Ég tók í spaðann á þjálfarateyminu eins og ekkert hefði í skorist.“

Hannes bendir svo á að nokkrum dögum síðar hafi hann spilað mikilvægan landsleik við Rúmeníu fyrir Íslands hönd og álagið lygilegt.