FH hefur staðfest komu Sindra Kristins Ólafssonar til félagsins frá Keflavík. Skrifar hann undir þriggja ára samning.

„Það er okkur sönn ánægja að tilkynna að markvörðurinn Sindri Kristinn Ólafsson hefur skrifað undir þriggja ára samning við FH. Sindri hefur að undanförnu sannað sig sem einn besti markvörður landsins en þessi hávaxni leikmaður hefur spilað með Keflavík allan sinn feril.,“ segir á vef FH.

Sindri er fyrsti leikmaðurinn sem Heimir Guðjónsson fær til FH en hann var ráðinn þjálfari liðsins í síðustu viku.

Sindri er fæddur árið 1997 en hann spilaði 25 leiki fyrir Keflavík í Bestu deildinni í sumar og stóð sig með miklum ágætum.

FH ákvað að endursemja ekki við Gunnar Nielsen sem hefur yfirgefið félagið. Atli Gunnar Guðmundsson kvaddi svo FH fyrr í dag.

Sindri var í landsliðshópi Íslands sem mætti Sádí Arabíu og Suður-Kóreu á dögunum en kom þó ekki við sögu í þeim leikjum.