Mauro Icardi er talinn vera að hitta tyrknesku leikkonuna Devrim Ozkan.

Icardi og Wanda Nara eru að skilja en þau hættu saman fyrr í haust. Sambandsslitin hafa ekki verið í góðu ef marka má ummæli framherjans í síðasta mánuði.

„Hún er aðhlátursefni heimsins með hegðun sinni, með framkomu sinni. Ég er ekki tilbúinn að verja það sem er óverjanlegt,“ sagði Icardi.

Wanda er að hitta 22 ára gamla rapparann L-Gante, en sjálf er hún 35 ára. Þetta virðist hafa farið illa í Icardi. Mjög stutt var liðið frá sambandsslitum þeirra þegar fregnir af sambandi Wöndu og L-Gante bárust.

Nú sást leikmaðurinn á mynd með Ozkan, sem er 24 ára gömul, en liðsfélagi hans Lucas Torreira var einnig á myndinni, ásamt fleirum.

Þá segja fjölmiðlar ytra að Ozkan hafi mætt á nokkra leiki Galatasaray á tímabilinu, þar sem hinn 29 ára gamli Icardi spilar.

Wanda var einnig umboðsmaður Icardi en hann hefur látið hana fara. Það gerðist í kjölfar þess að hún krafðist um 144 milljóna íslenskra króna fyrir þátt sinn í félagaskiptum framherjans til Galatasaray í sumar.

Icardi gekk í raðir tyrkneska félagsins á láni frá Paris Saint-Germain.