Sparkspekingurinn og Manchester United-goðsögnin Gary Neville segir að enn sé langt í það að Arsenal sanni það fyrir honum að liðið geti barist um Englandsmeistaratitilinn.

Arsenal er á toppi deildarinnar, tveimur stigum á undan Manchester City sem stendur.

„Það eru 25 leikir eftir af tímabilinu, með mikilli truflun frá HM, en ég sé Arsenal ná topp fjórum á þessari leiktíð,“ segir Neville.

„Ef Arsenal tapar tveimur leikjum og liðin fyrir neðan vinna á sama tíma eykst pressan og það er þá sem við sjáum hvort Arsenal höndli hana. Stóra augnablikið verður í febrúar og mars, þá sjáum við úr hverju þeir eru gerðir.

Það eina sem Arsenal hefur sannað undanfarin ár er að liðið klúðrar málunum í lok tímabils. Þar til ég sé annað hef ég alltaf efasemdir, og af hverju myndi ég ekki hafa þær?“

Neville hefur ekki trú á því að Arsenal geti barist við Manchester City um Englandsmeistaratitilinn allt til enda.

„Manchester City mun vinna deildina með 10-15 stigum á þessari leiktíð. Ég hef séð þetta áður þegar þú ert með lið sem er svona frábært. Það voru nokkur svona skipti þegar ég var leikmaður Manchester United, maður sá bara að þegar lið hefur það ekki í sér að fara alla leið og berjast við efsta liðið.

Ef Arsenal tekst það verður það ótrúlegt. Ég vil að City sé veitt samkeppni, en það gerist ekki.“