Heimir Hallgrímsson er gestur í nýjasta þætti af Íþróttavarpi RÚV. Fyrrum landsliðsþjálfarinn verður sérfræðingur stöðvarinnar í kringum Heimsmeistaramótið í Katar, sem hefst eftir tæpar tvær vikur.

Í þættinum var Heimir, sem nú er landsliðsþjálfari Jamaíka, spurður út í eftirminnilegasta leikinn er hann þjálfaði íslenska landsliðið.

„Það var útileikurinn á móti Tyrkjum, 3-0. Það var leikur sem einhvern veginn allt gekk upp. Uppsett atriði sem við vorum búnir að æfa gengu upp í þremur mörkum. Það voru hlutir sem við vorum búnir að teikna upp og æfa. Svo í leikslok þegar við fréttum svo að Finnarnir hefðu líka tekið stig af Króötum, þá höfðum við þetta okkar hendi að geta klárað þetta. Þetta var rosalega skemmtilegur leikur og umgjörðin var bara einhvern veginn þannig að það var ekki hægt að tala saman.“

Eftir leikinn var Ísland í kjörstöðu til að tryggja sér sæti á HM í fyrsta sinn, sem liðið gerði gegn Kósóvó í umferðinni á eftir.

„Ég held að þetta hafi verið í Konya. Það var bara ekki hægt að tala saman á bekknum, það voru svo mikil læti í byrjun. En svo lækkuðu strákarnir einhvern veginn styrkinn í áhorfendum eftir því sem leið á leikinn. Í lokin voru þeir svo eiginlega farnir að fagna okkur og klappa fyrir okkur. Þetta var einhvern veginn alveg súrrealískt hvernig allt snerist þetta kvöld. Það voru einhver æðri máttarvöld sem voru með okkur í liði þarna,“ segir Heimir um leikinn í Tyrklandi.