Barcelona neyddi Gerard Pique ekki til að hætta hjá félaginu en hann spilar sinn síðasta leik um helgina.

Pique hefur leikið með Barcelona frá árinu 2008 en gaf það út fyrir helgi að hann væri að leggja skóna á hilluna.

Barcelona skuldar Pique um 30 milljónir evra í laun en hann ætlar að leggja þá skuld niður og labba frá borði endanlega.

Xavi, stjóri Barcelona, hefur tjáð sig um málið en hann ræddi við Pique í sumar og tjáði leikmanninum að hann yrði ekki númer eitt í goggunarröðinni á tímabilinu.

,,Pique er leikmaður sem er enn samningsbundinn og hefði getað haldið áfram hjá félaginu,“ sagði Xavi.

,,Við ræddum saman í einrúmi í byrjun sumars og ég útskýrði hans stöðu hjá félaginu sem var eitt það erfiðasta sem ég hef þurft að gera sem stjóri.“

,,Við heyrðum af hans ákvörðun í þessari viku. Ég hef auðvitað spilað mitt hlutverk í þessari ákvörðun en sannleikurinn er sá að ég hef þurft að velja marga fram yfir Pique í mörgum kringumstæðum.“

,,Það er ekki léttir að hann sé á förum. Þetta er persónuleg ákvörðun fyrir hann og ég hef reynt að vera heiðarlegur í samtali við hann. Það er alltaf skoðun leikmannsins að þetta sé þjálfaranum að kenna.“